Hövzə Xəbər Agentliyinin beynəlxalq bürosunun “İslami Analiz”ə istinadən verdiyi məlumata görə, türkiyəli yazıçı və analitik Əhməd Varol son dövrdə Livan rəsmilərinin “Hizbullah” və İranla bağlı mövqelərini tənqid edən bir məqalə ilə çıxış edib və Livan hökumətini İsrail qarşısında passiv yanaşma sərgiləməkdə ittiham edib. O, bu kontekstdə belə sual ünvanlayıb: “Siz həqiqətən Livanı müdafiə edirsiniz, yoxsa sionist işğalçıların tərəfindəsiniz?”
“Ölkənin sahibi sizsiniz, yoxsa sadəcə onun keşikçisi?” başlıqlı məqaləsində Varol qeyd edib ki, dövlət rəhbərləri ərazilərin sahibi deyil, əksinə xalqın hüquqlarını və ölkənin ərazi bütövlüyünü qorumaqla məsul olan şəxslərdir. O, bu çərçivədə Livan prezidenti Cozef Aunun son açıqlamasına da toxunaraq onun Hizbullah və İrana ünvanladığı “Bu ölkə sizin ölkəniz deyil, bizim ölkəmizdir” sözlərini xatırladıb.
Yazıçının fikrincə, Livan nə Cozef Auna, nə Hizbullaha, nə də İrana məxsusdur, əksinə, ölkə yalnız öz xalqına aiddir və rəsmi qurumlar xalqı İsrailin hücumlarına qarşı müdafiə etməlidirlər.
Varol Livan hökumətinin ABŞ-ın vasitəçiliyi ilə aparılan atəşkəs danışıqlarındakı mövqeyini də tənqid edərək bildirib ki, Livan nümayəndə heyəti bu prosesdə qətiyyətli və ləyaqətli mövqe sərgiləməyib, Livan ordusu isə İsrailin hücumları və irəliləyişləri qarşısında effektiv cavab verə bilməyib.
O, həmçinin Livan baş nazirinin İrana ünvanladığı və “Livanın cənubunun danışıqlar aləti kimi istifadə edilməsinin dayandırılması” tələbinə də toxunaraq qeyd edib ki, əgər Livanın cənubundakı insanlar üçün kimdənsə mərhəmət istəniləcəksə, bu müraciət İsrail kimi təcavüzkar tərəfə edilməlidir, İrana deyil.
Türkiyəli analitik əlavə edib ki, Livan və İsrail arasında imzalanan atəşkəs razılaşmalarına baxmayaraq, İsrail bu razılaşmalara əməl etməyib və son razılaşmadan sonra da hava hücumlarını davam etdirib. Onun sözlərinə görə, İran da bu hücumlara cavab olaraq və İsrailin Livana qarşı təcavüzünü dayandırmaq məqsədilə işğal olunmuş ərazilərdə bəzi hədəfləri ballistik raketlərlə vurub.
Əhməd Varol sonda Livan rəsmilərinə müraciətlə belə sual ünvanlayıb: “Livan xalqı sionist ekspansionizm və təcavüz təhlükəsi ilə üz-üzə ikən siz ölkəni müdafiə edirsiniz, yoxsa faktiki olaraq işğalçıların yanında mövqe tutursunuz?”
Rəyiniz